همام حسام

همام حسام
________________________________________
.1.


يُومْ تَوْلْدْ الْوَلْدْ،طَلْعَتْ نَجْمَة **** تْلاَلِي،نُورْهَا مْوَضحْ بْيَا سَلاَمْ

تَخْلَقْ في بِيتْ،فقِيرْ َللنعْمَة **** وْخَالي فْراشُو،مَنْ كُلْ تَقْوَامْ

هُوَ صْغِير،قَال ليه بوه الكلمة **** أنا،أوليدي،كنيتي لهمام

وسميتك حسام،وبيك الهمة **** هزو،في يديه،لواه بسلهام

الملايكة باركو بالرحمة **** لخلايق شاركو بزين الكلام

نواعر ضارو بريح القسمة **** والقدر ليه تشمر بلحزام

والزمان لصدرو ضمو بضمة **** وتربع في كرسيه جلال لهمام

شمسو،في السما دارت خيمة **** قمرو في لوطى أحفل بليام

لمطر و لبرق شدو النغمة **** لحساب،مع لرعود،سار زكلام

الربيع،ولخريف قسم قسمة **** الشتا بالصيف،هزات لعلام

لبحر،للبر،كشف عن الظلمة **** لاأرض ولفضا،قالو لنظام

الجو كلو،بيه صغى للحكمة **** وهي تتفرق بإسم الضرغام

وفي وسط للألمب،تلمت لمة **** باركو كلهم لخلوق الغلام

الشيطان لخسيس،جاتو حمة **** عفارت الأرض،سكنو لحطام

قالو:اليوم بدات النقمة **** يا بني الجن،ويلكم لحسام

فيه شجعان العرب بالضمة **** تجمعو،عطاوه شجاعت لقلام

عنتر،والسيف،وذات الهمة **** لهلالي،وعلي،وسيف الإسلام

مومن بربي،والنبي،ولأمة **** بخصايل الخير،ضم الإمام

على الشر زاطم كل الزطمة **** عل الحب،طالق جنح الوئام

في خدو شامة تجيب السلمة **** شايفو في عشقو،راه مسقام

رحتو أصل كل عطور الشمة **** شامو،متمتع بريحت لنسام

وحبيبو،ماتلقاهش الغمة **** يركبو عودو،يعطيه للجام

أمراعي لأصول شرع الأمة **** تفرح لحبو،جميع الأريام

لوجه أمدور،وفيه الوسمة **** عيون لحجل،ولشفار توام

فخاد سواري،وسيقان عرمة **** المشية لايمشي كنو لحمام

والقامة،فارعة من القمة **** صدور لوح،رحيب كيف لغمام

وزاد في وصفو بكل الكلمة **** وتفرقو لبشاير،بين ليام

وعاش لحسام في ظل الرحمة **** وبحنان الأب،داك الهمام

بستر الله تدارت الحكمة **** حتى وصل عمرو لثمن أعوام

ومات البو في ليلة مظلمة **** وشحال تبكى عليه الحسام







2

مات أباه مسكين،بقات أمو **** تزوجت عمو،كان راجل حطاب

الشيطان ساكن ديمة بكمو **** سميتو حمان،ومكني لغراب
سنانو رايبين،الكيف همو **** لخمر،والمعجون،ليه صواب
إد وفي لمدابزة،سيفت فمو **** وكلامو مخيظل، بدون اسباب
كيف تعبان،نابو نافت سمو **** عيشو بلملذة في أيام كلاب
إحبطو الشوك،ويزينوظلمو **** ودمعو كتشافي وسط ضباب
يبكي لحطب ملي ليه إضمو **** خلايق الغابة تذكر لحباب
حشيش الأرض،ورفو ذاق دمو **** الورد لأشفارو لم لهذاب
شابل الواد،فاض بعمق غمو **** الطين للحجر ندد بلعذاب
الكل تعجب في ظلم داك عمو **** سبوعة،ثعالب،خرفان،وذياب
باع العم الدار،ليه حرمو **** من عيشتو فيها وسد الباب
سكنهم في خربة كانت غنمو **** داها في لقمر لواح كراب
وعاش حسام،ولا من هو إرحمو **** والله عالم بما في لكتاب
لحياة واعرة،يا من اتهمو **** فيها ناس،ما شملهم بثواب
ما يعرفو ليتيم ولا ليتمو **** قلوبهم قاسحة كيف الكلاب
لكن ربي مقدر،ليه عملو **** تخليق البنية وسط لرياب
وشب الحسام في لياع ظيمو **** حمم الشارب ووصل للتشياب
بعد سنين ماتت بالهم أمو **** تهنات من فانية لعذاب
وهز رحيلو كلو من دار عمو **** وسكن كوخ،بناه وسط الغاب
هاجر الناس،وكل من إظلمو **** ليتيم،ولعجوز،والمشياب
والعيشة بجنب لخشى وسمو **** أحسن من معشرات أولاد لكلاب
ما يشوف حد،ولا إشم لنسيمو **** كل خلق الغابة،ولأوأصحاب
الليل منحو أسرار في نجمو **** ونهار،ينورو نساه لنحاب
وسار يعبد الله وكل حكمو **** بان بجبينو،دينا لأداب
وطول العام صاير في صومو **** قوتو باليل،فاكهة الغاب
ولد العشرين،ما قدت تأمو **** لامناكر،لافواحش،ولالنصاب
وتفتح قلبو للخير وسلمو **** رمى الشر برى،وغمض لهذاب
ومن غصن الشجرة دار قلمو **** في جريدة لنخل قرا لكتاب
ولا حد إزعزع لحياتو وهمو **** وفليلة نزلات ليه لمصاب




3

كانت ليلة قوية كل بردها **** ظلام لرعود،ولبروق يعميه

وهو في الصلاة يؤدي فرضها **** سمع حس ألطيف جاي من لهيه
وسجد السجدة،وعطى لحقها **** وعلى السجدة لاحد كيلهيه
هز راسو لقاها في بسمتها **** ما عرف منين هي دخلت عليه
ونفسو تحركات في جعبتها **** ولعقل ثلاح في سؤال التيه
الكوخ تعمر بطول وقفتها **** لفران طفى،بلا ما هو يطفيه
ضوات هي القاعة بخزرتها **** كيف النور عيونها ترميه
ما تكلمت بكلام في ذخلتها **** أو سلام،كان في فمها تلقيه
ريح للبراكة مقلع دفتها **** جهد البرد،كان غدي يديه
خزرت في الدفة أو وقفتها **** وقالت للكمرة ظلام حيديه
قالت للريح لرعود فرقيها **** قالت للشتا،هاد البرق رديه
وتخلع حسام في كل عملتها **** ويا ربي،المومن لاش تبليه
هاذ الخلقة،منين قريتها **** لاش جات لكوخي باش تواطيه
تكلم في سرو،وهيا سمعتها **** وتبسمت بسمة بغات تجليه
لسنان جوهر،تشبه ضحكتها **** خدها بلعمان،أمشبه بيه
شفايف ورد في رحيق لذتها **** النيف منقاد،جبهة تنسيه
عيومن كيسان،الما رمشتها **** تروي العطشان بعد تقليه
لوجع داير،كسما وكمرتها **** ها الشعر شقر،للظهر مغطيه
الرقبة حمام في نعومتها **** لنهود،تفافح لصدر تلاقيه
الصرة محزومة،بلا سمطتها **** فرق ليمونة لردف توجديه
ولبطن عجينة في خميرتها **** البوط عنبة،للسان تحليه
الفخدين خط بطول رسمتها **** السيقان عود،لوتار تغنيه
القدمين حوتات بعومتها **** صباع قلومة،والظفر تديه
تديه المشطية،بملوستها **** جمعت الكل،للقامة توريه
بهض حسام زينها،وزينتها **** قال:يا حرمة شرك ما باغية
حق الضيافة راني فهمتها **** أهلا بالضبف،كما كان سقيه
وهب نسيم ململ لذفينتها **** فاضت روايح الطيب عليه
قالت:سميتي للسان لذتها **** تفاجي قلبك،وليك تراعيه
اسمي الزرقا بنت لبهى **** أبي ملك الملوك تاج نزيه




4


وقالت زرقا كلامها وغبرت **** وبقى حسام في لمكان إشوف

بغى إفكر،أفكار عقلو تمت **** بغى إصيح،لألسانو مخطوف

دخلاتو الرعشة،عليه تلمت **** كلو هواجس،وكلو للمصروف

واش كان اللي شفت ...؟ **** أو حقيقة اللي كنت انشوف

هياجت الريح،سمعها زادت **** لرعود رجعت كيف المألوف

كل خلايق الغابة راه صمتت **** صوت الذياب كان والحلوف

وتفكر لفنار شعلو وتصنت **** غير حس صدرو،لاحس جا معروف

بان وسط البراكة،وتنارت **** رجع النور،ولأكل شي مكشوف

شاف مكانها،لا أثر هيا خلت ****حتى طيبها،ما تشدو لنيوف

الباب،كنو،دفتو ما تعلقت **** القمر للغابة،رام لخسوف

أو لغمامة على وجهو تغمت **** صهد لحزان من لكفوف

لرجاضة،بالقلب راه سكنت **** الشعر وقف،ولأكتبن منتوف

ياربي،ياك ليك نفسي همدت **** وعليك قلبت كيف المتلوف

فارقت الناس،حتى قلت فلت **** داب هاني،وسط كفة بلا صروف

وواش وقع ليا،وبعد الصمت **** جات خلقتو وداتني لهتوف

وكيف المعمول وليه سلمت **** أمري،وحالي،ذاتي،ولصروف

وسمع حسام لصوتها وتلفت **** لجيهت الحس،عقلو ملهوف

قالت:أنت ليا وليك اخترت **** لهوى ما عذر ناظر،ومكفوف

أنا حبيتك،وليك انت سلمت **** زمام عمري،وزيني،ولحروف

أنا حليتك لشعوري وتوست **** فراشي،وغطايا بيك ملفوف

تكون معايا هذا اللي ردت **** ألا...قلبك بحبي يولي منسوف

الله يا زرقا،ليك أش عملت...؟ **** أنا مسكين،للوحدة موصوف

هاد ليام،بياضارت ووقفت **** لوسط لنغايص،هاني مجروف

لهوال على ذاتي،جهد أدكت**** بعد،والشقا،الدمع انزوف

راني شبه راعي غنمو جفلت **** أنا قدام الذيب،كي لخروف

قلبي في حب الله سار مشتت **** مالي في الدنيا زرع وصوف

شوفي غيري يمكن ليك ينصت **** لحبك يفهم لكتاب،ولرفوف

قالت:راني لكلامك ما سمعت **** أنا عزمت عليك بكل مغروف

أنا شباك الحب عليك شبكت **** في حبي ببحثك تولى معروف

وبعد هذا الحديث عليه صمتت **** قام لصلاتو،ويلعن الظروف
5
وعاش لحسام معلق بالدين**** الله والرسول،فعل ليمان

مبعد عليه دنيت الأدميين**** مرافق غصن،زهر،والحيوان
لكن خيالها بخيالو كاين**** يبغي ينساه،في عقلو يبان
إطردو من بالو يغيب سنين**** في الحين يتحداه بسلطان
لنو ذبل،لجفان سهرانين**** وملاك الحب يشطن الرهبان
يستغفر،ويصلي،إحن،وينين**** يلعن لمرا،الحب،والشيطان
خاطرو جفل،بدموع الخدين**** لسانو شلال،وديمة عرقان
نهارو مخمعلقامت الزين**** ليلو إكبر صورتها،وشمان
يسجد السجدة،يطلب لعوين **** يرفع راسو،تجيه الأشجان
يبكي بالدمع،مالح وسخين**** يصيح بالأهة يا الرحمان
وحدو في كوخ إينادي لحزين**** لاحد ليه إرد في داك لمكان
ولات ذاتو مطحونة كل طحين **** غرق في بحر،ما يعرف عومان
لمن تنادي وحدك يا مسكين **** الحياة بركان،ترمي حرمان
وبقيتي بين سالب وتمكين **** عليك لفواجع دارت لرهان
قضات لمحبة عليك متفقين**** داروك كظالم وأنت إحسان
ما نفعاتك عبادة ولا يقين **** رهين بين الدين،والحب،ولفتان
يا إما تعبد الله المعين**** يا إما تولي مطرقة وسندان
هكذا ولا حسام بين قوسين**** ذات مالها معنى ولا لمعان
وكان مومن ولا في شر كفرين**** كفر عبادة أو كفر بالخلان
بالصراع في نفسو صارعين **** وولات القبلة كيف السجان
وكان تابع لنبي في الدين **** ولابحبيبو متبوع لنيبان
عقلو كان،ضاهي العاملين **** ولابحمقو جيعان وعطشان
وكان بالله،قال ليه آمين **** ولاهلحد بينو لعشق عريان
كيشوف اللبدة يولي حزين **** وكيشوف حالتو يرجع خجلان
فين لحسام،فين هو لرزين..؟ **** فين لعبادة بحب للرحمان..؟
لامر ضمو لشرع الجاحدين**** وكان واعي بحالو ولاغفلان
ياويح من أهوا العينين **** والصدر لعناق،والنهدان
إيولي مسكين خميرات لعجين **** إيولي شفاية لكل العديان
حمام،حيوطو عليه رايبين **** الصهد سوس قاعو بالدخان


6

بالمبيت الملك في حزانو **** يا راحت بنادم عفاك سمعني

يا لمشتت الخلان كانو **** عشرة..أنا نادي غير فهمني
يا الملاك الفرحان لهجرانو**** انت الحب.ترفدني وتحطني
ليك ما يوصف الفم بلسانو**** بيك ما نبرد،ملي تحرقني
الرمش طايب،وفيه سهرانو **** القلب معاك غادي إندمني
كنت تاقي،ومومن بإيمانو **** صرت فيد الشيطان يرجمني
طفيتي شمعي بعد شعلانو **** حاط الليل بيا،ظلام دركني
قلعتي من ربيعي ريحانو**** دخولك لصدري زاد فجرني
يا الحب،أنا عبد في عسانو**** ويبعد لعشيق عليا،زاحمني
يا الحب،كنت سبع في زهرانو**** ولييت بومة والناس تلعني
يا الحب،كنت شاب في ريعانو**** دركتني بهرمك،لعجز سكني
يا الحب،عرفت الدين فيقانو **** ها أنا بيك،نسيت خالقني
يا الحب،روحي،ونفسي يلعانو**** ديك تفرحني،لخرى تقرحني
يا الحب،عودك ركب طغيانو**** نبغي نركبو،ساقو يركلني
يا الحب،لفمي تهدم سنانو**** لبيار النار نولي أمدني
يا الحب،جيشك موحش قتلانو**** ما يرحم يتيم،لاعجوز محني
يا الحب،قاصدك تعزى شانو**** تدفنو حي،عليه لحجرتبني
يا الحب،طريقك في نيشانو**** كلو لويات،شرابو يجرحني
يا الحب،وما يشبع جيعانو**** حنظل،وحدج،أشواك تزحفني
يا الحب،طيرك طير جنحانو**** يخطف عيني،بعروق يكتفني
يا الحب،بحرك غرق حيتانو **** بالصياد،والشبكة كتفني
يا الحب،مولودك لشيطانو**** يقتل الأب،وبالأم كبرني
يا الحب،بابك مطرق دفانو **** داخل دارك،خرج منها محني
يا الحب،وتري نسى ألحانو **** صوتي بح،بموالك كنت نغني
يا الحب،فطر حالي صومانو**** وبعد ما نذنب راه يتركني
يا الحب،عيدي بغيضانو**** بهزل،ونكاتي ليا يوصفني
يا الحب،شيب شفر وحجبانو**** طلع نهج في لوريد وخنقني
وهذا حسام تمحن عشقانو**** كان ممدود،بالحب ولامتني
شعلو حب الزرقا،بتمحانو **** يكتب لمصيرو،والحب يسني
النوم صار يهوى فيقانو **** ذاتو نحيلة،قلبو ما مهني

____________________________________________